«Қумтор» билан боғлиқ айбловлар Қирғизистоннинг собиқ президентлари Асқар Акаев, Қурманбек Бакиев ва Алмазбек Атамбаевга қарши қўйилган.
Қирғизистон Миллий хавфсизлик давлат қўмитаси раиси Қамчибек Ташиев «Қумтор» олтин конини ўзлаштириш бўйича 20 га яқин юқори мансабдор жавобгарликка тортилганини маълум қилди.
Бу ҳақда у 28 ноябрь куни Талас туманидаги Аманбоевский қишлоқ ҳокимиятининг янги биносининг топшириш маросимида айтган.
“Олтин кон масаласида биз икки президентни, тўртта бош вазирни, икки (Жўқорғу Кенеш) спикерини ва ўндан ортиқ бошқа юқори лавозимдаги амалдорларни жавобгарликка тортдик. Шунга асосланиб, биз Қумторни давлатга қайтаришга муваффақ бўлдик”, деди махсус хизмат раҳбари.
2021 йилнинг май ойида Қамчибек Ташиев «Қумтор» конини ўзлаштириш бўйича тўртта жиноий иш қўзғатилаётганини, бу ишлар доирасида депутатлар ва турли юқори лавозимдаги мансабдорлар тергов қилинаётганини маълум қилган эди. «Қумтор» билан боғлиқ Қирғизистоннинг собиқ президентлари Асқар Акаев, Қурманбек Бакиев ва Алмазбек Атамбаевга айбловлар қўйилган.
Март ойида “Қумтор Оперейтинг компани” ёпиқ ҳиссадорлик жамияти акцияларининг юз фоизи Қирғизистон ҳукумати ихтиёрига ўтказилган эди.
“Қумтор” олтин конини ўзлаштириш бўйича Қирғизистон ҳукумати 1992 йилда Канаданинг “Камеко” ширкати билан шартнома имзолаган эди. 1996 йилдан конда олтин қазиб олиш бошланган. Қирғизистон конни “Қумтор Оперейтинг компани” орқали Канаданинг “Центерра Голд” ширкати билан ҳамкорликда бошқариб келган.
2021 йил майида ҳукумат конни тўлиқ Қирғизистон ихтиёрига ўтказиш тўғрисида қарор чиқарган ва 2022 йилда ширкат акцияларининг юз фоизи “Қирғизолтин” ширкатига берилган эди. Дастлаб Қирғизистонни бу қарор учун судга берган “Центерра Голд” кейинроқ ўзининг барча даъволаридан воз кечган.
